Ti nuk je vetëm, Perëndia është me ty!
5. gusht e mërkurë
“Unë jam kreu i ushtrisë së Zotit; sapo kam arritur në këtë cast.” Jozueu 5:14
Bibla thotë: “Por ndodhi që, ndërsa Jozueu ishte afër Jerikos, ngriti sytë dhe shikoi, dhe ja, një njeri i qëndronte përpara, me në dorë një shpatë të zhveshur. Jozueu i doli përballë dhe i tha: ‘A je ti për ne o për armiqtë tanë?’. Ai u përgjigj: ‘Jo, unë jam kreu i ushtrisë së Zotit; sapo kam arritur në këtë çast’. Atëherë Jozueu ra përmbys para tij dhe tha: ‘Çfarë dëshiron t'i thotë Zotëria ime shërbëtorit të tij?’. Kreu i ushtrisë së Zotit i tha Jozueut: ‘Zbath sandalet, sepse vendi ku je është i shenjtë’. Dhe Jozueu veproi ashtu.’” (v. 13-15).
Mesazhi këtu është i pagabueshëm: Jeriko mund të ketë muret e veta, por ti Jozue ke më shumë. Ti ke Perëndinë. Ai është me ty. A nuk është kjo fjala që Jozueu kishte nevojë – një kujtesë e pranisë së plotfuqishme të Perëndisë? A nuk është kjo ajo që ti ke nevojë – të dish se Perëndia është afër, nqë ti nuk je kurrë vetëm dhe që në orën më të errët, në pyetjet e tua më të thella, Zoti nuk do të të braktisë kurrë. Davidi tha: “Zoti është pjesa ime nga trashëgimia dhe kupa ime; ti, o Zot, ruaje fort atë që më ka rënë në short. Mua fati më ka rënë në vende të këndshme; po, një trashëgimi e bukur më ka rënë. Unë do të bekoj Zotin që më këshillon … Unë e kam vënë vazhdimisht Zotin përpara syve të mi; duke qenë se ai rri në të djathtën time, unë nuk do të hiqem kurrë nga vendi. Prandaj zemra ime gëzohet” (Psalmi 16:5-9).
A po përballesh me një sfidë të nivelit të Jerikos? Nëj atë që bëri edhe Jozueu: “Ngriti sytë dhe shikoi, dhe ja, një njeri i qëndronte përpara” (Jozueu 5:13). E ke parë problemin tënd mjaftueshëm. Ngriji sytë lart drejt zgjidhësit të problemit —Jezusit!
