Kaloja dikujt!
6. nëntor e enjte
“Dituria është gjëja më e rëndësishme; prandaj fito diturinë. Edhe sikur të humbasësh ato që ke, fito diturinë” Fjalët e Urta 4:7
Mentor Graham ishte aq i përfshirë në vlerësimin e detyrave që i kishte dhënë studentëve të tij, sa ai nuk e vuri re gjigandin e ri i cili hyri në klasën e tij në Illinois një ditë pas shkolle. Pasi sytë e tij u mësuan me dritën e diellit të pasdites dhe e pa djalin e ri që po qëndronte përpara tij, ai pa se ky djalë ishte i sapoardhur në këtë komunitet. Djali menjëherë kishte fituar një reputacion se i “zhdëpte në dru” të gjithë të fortët e vendit. Grahami me të drejtë mund të mendonte: “Çfarë kërkon ky këtu? A jam në rrezik?”. Në vend të kësaj, ai e pa nga koka te këmbët atë masë muskulare dhe injorance prej 1.93 metrash dhe i ofroi ndihmë me leximin dhe studimet e tij. Kur djali e la klasën një orë më vonë, ai doli me disa libra në krahë – të dhëna hua nga Mentor Graham, duke i premtuar më shumë në të ardhmen.
Me shumë mundësi nuk ke dëgjuar kurrë për Mentor Grahamin apo jo? Ai ishte një burrë i qetë, i cili thjesht donte të bënte më të mirën për çdo student që vinte tek ai. Nxënësi i tij megjithatë, u bë më i famshëm. Emri i tij? Abraham Linkoln! Grahami pa tek Linkolni një uri për njohurinë dhe një dëshirë për të mësuar dhe kaloi kohë duke investuar tek ai. Dhe si rezultat, Linkolni ndryshoi historinë. Investimi më i madh që mund të bësh është tek njerëzit. Solomoni shkroi: “Dituria është gjëja më e rëndësishme; prandaj fito diturinë. Edhe sikur të humbasësh ato që ke, fito diturinë”. Dhe kur ta marrësh, mos e mbaj për vete – kaloja dikujt.
