Kërko të fuqizosh të tjerët
22. nëntor e diel
“Mbasi i thirri bashkë të dymbëdhjetë dishepujt e vet, u dha atyre pushtet…Dhe i nisi të predikojnë” Luka 9:1-2
Njerëzit e sigurt në vetvete kërkojnë të fuqizojnë të tjerët. Jezusi ishte mjeshtër në këtë gjë. Duke fuqizuar dishepujt e Tij, Ai u sigurua që misioni i Tij në tokë të vazhdonte të përmbushej edhe shumë kohë pasi Ai të ishte larguar. Të fuqizosh do të thotë të mbushësh me fuqi. Fuqia është energji. Kur e bëjmë zakon të fuqizojmë të tjerët, ne i japim atyre energji për të arritur qëllimet e tyre. Jezusi e praktikoi këtë parim: “Kush beson në mua do të bëjë edhe ai veprat që bëj unë; madje do të bëjë edhe më të mëdha se këto” (Gjoni 14:12). Nuk ka asgjë më demoralizuese sesa të mbahesh jashtë rrjedhës së informacionit që të ndikon drejtpërdrejt. Sado e vështirë që duhet të ketë qenë t’i bënte dishepujt e Tij të kuptonin, Jezusi e dinte se duhej t’i informonte për ngjarjet që do të vinin dhe që do t’i preknin ata. “Dhe u thoshte atyre: ‘Së shpejti Biri i njeriut do të dorëzohet në duart e njerëzve dhe ata do ta vrasin; dhe, pasi të jetë vrarë, ai do të ringjallet ditën e tretë’” (Marku 9:31). Më vonë u tha atyre: “ Unë po shkoj t'ju përgatis një vend. Dhe…do të kthehem dhe do t'ju marr pranë meje, që aty ku jam unë, të jeni edhe ju” (Gjoni 14:2-3).
Fuqizimi ndodh kur u beson njerëzve një detyrë ose përgjegjësi pa i mikromenaxhuar. Të fuqizosh do të thotë thjesht të lirosh pak frenat mbi mënyrën se si do të bëhet diçka, ndërkohë që ruan kontrollin mbi atë që duhet të bëhet. Udhëheqësit e mirë fuqizojnë të tjerët. Ata e dinë se njerëzit performojnë më mirë kur u jepet liria për të përfunduar punën e tyre me një shkallë të caktuar pavarësie. Kur kjo ndodh, njerëzit “marrin pronësinë” e një projekti, pune ose funksioni, dhe gjërat përfundojnë me rezultate më të mira. Kjo është një fitore për të gjithë.

