Fjalët e tua kanë fuqi
31. tetor e shtunë
“Çdo njeri të jetë i shpejtë në të dëgjuar, i ngadalshëm në të folur” Jakobi 1:19
Ajo që del nga goja jote dhe edhe ajo që mund të shkruash në mesazhe ka një rëndësi kaq të madhe sa Jakobi i kushton pothuajse një kapitull të tërë (shih Jakobi 3:1–12). Pse? Sepse fjalët e tua kanë fuqi. Ato mund të bekojnë ose të thyejnë, të ndihmojnë ose të dëmtojnë. Njerëzit që kanë qenë objekt i fjalëve të ashpra mund të mbajnë plagë për gjithë jetën. Shumë fëmijë kanë dëgjuar një prind të irrituar duke thënë: “Ti nuk vlen dhe nuk do arrish kurrë asgjë.” Dhe ata e kanë besuar këtë, duke lejuar që ato fjalë të formësojnë imazhin e tyre për veten dhe të përcaktojnë vlerën e tyre personale. Fëmijë të tjerë kanë pasur prindër që i kanë afirmuar dhe inkurajuar me fjalë pozitive, si:
“Ti je i rëndësishëm, dhe Perëndia ka diçka që ti mund ta bësh që askush tjetër nuk mund ta bëjë ashtu si ti.” Këta fëmijë e kanë besuar këtë mesazh dhe në fund u rritën për të vepruar sipas tij.
Jakobi bëri tre deklarata për përdorimin e gjuhës sonë dhe dha dy ilustrime për secilin. (1) Ai na kujtoi se fjalët mund të kontrollohen dhe drejtohen, dhe e ilustroi këtë me frerin e një kali dhe timonin e një anijeje. (2) Ai tha se fjalët përçarëse mund të jenë shkatërruese, si zjarri dhe helmimi. (3) Së fundi, ai tregoi se fjalët kontradiktore mund të jenë mashtruese dhe këtë e ilustroi me një burim uji dhe një fik. E vërteta është se fjalët tona zbulojnë se çfarë ka në zemrën tonë. Dhe qoftë kur i flasim, qoftë kur i shkruajmë, ato kanë fuqinë të shërojnë ose të dëmtojnë, të ndihmojnë ose të pengojnë. Duke ditur se nuk ke pse të tërheqësh mbrapsht fjalët që nuk i ke thënë, David lutej: “Vër një rojë mbi gojën time, o Zot” (Psalmi 141:3).
