Tre hapat për të mposhtur depresionin
7. janar e mërkurë
“Tani mjaft, o Zot! Merr jetën time” 1 Mbretërve 19:4
Elia u trishtua aq shumë sa donte të vdiste. Ja kura që Perëndia i dha atij për t’u çliruar nga depresioni: (1) Rifreskohu. “Një engjëll e preku dhe i tha: ‘Çohu dhe ha’. Ai shikoi dhe pa pranë kokës së tij një kulaç të pjekur mbi gurë të nxehtë dhe një enë me ujë. Ai hëngri dhe piu, pastaj përsëri u shtri” (vargjet 5-6). Elia ishte i rraskapitur. Ai kishte agjëruar për një kohë të gjatë, kështu që trupi i tij ishte dobësuar. Ai gjithashtu kishte vrapuar tetëmbëdhjetë milje për të dhënë lajmin e mirë të fitores së tij mbi profetët paganë, gjë që ia shtoi dobësinë fizike. Pushimi i mjaftueshëm dhe një dietë e ekuilibruar mund të bëjnë mrekulli për jetën tuaj.
(2) Përqendrohu te Perëndia. Kur i heq sytë nga Perëndia dhe përqendrohesh tek vetja, fillon të forcosh çdo vështirësi që has dhe shpërfill Atë që mund të zgjidhë çdo problem që ke. Perëndia i tha Elias: “Dil dhe ndalu mbi malin përpara Zotit” (vargu 11). Një pastor vëren: “Kur Perëndia ka veshin tënd, Ai mund të flasë në të. Kur Perëndia ka zemrën tënde, Ai mund t’i shërbejë asaj”.
(3) Kujdesu për të tjerët. Perëndia i tha Elias: “Do ta vajosësh Hazaelin mbret të Sirisë…Do të vajosësh pastaj Eliseun, birin e Shafatit nga Abel-Melohahu, si profet në vendin tënd” (vargjet 15-16). Ndoshta duhet të gjesh dikë për t’i shërbyer. Nuk je i vetmi që ke probleme; ka njerëz në gjendje më të keqe se ti. Nëse do të shohësh që mjegulla e trishtimit të zhduket, ndalo së shikuari brenda dhe fillo të shikosh jashtë.
