Gjej një mentor (2)
13. tetor e diel
‘Mësoni nga unë’ Mateu 11:29
Jezusi tha: ‘Unë do të ndërtoj kishën time dhe dyert e ferrit nuk do ta mundin atë’ (Mateu 16:18). Kur Ai i tha këto fjalë, drejtuesit fetarë të kohëve të Tij ishin duke thurur vdekjen e Tij, shoqëria në të cilën Ai jetonte kontrollohej nga fuqia e Romës dhe ndjekësit e Tij ishin njerëz të thjeshtë. Duke folur nga ana njerëzore, ato që Ai premtonte ishin të pamendueshme dhe mundësitë që ato të ndodhnin ishin zero. Megjithatë, ndodhi.
Dy mijë vite më vonë, Ai është autori më i cituar në botë dhe shumë nga vlerat tona janë bazuar në parimet që Ai mësoi. Si e bëri Ai këtë? Duke mentoruar të tjerët. Prandaj, kur je duke kërkuar një mentor, përpiqu të gjesh dikë që shëmbëllen cilësitë dhe karakterin që tregoi Jezusi. “Ejani tek unë, o ju të gjithë të munduar dhe të rënduar, dhe unë do t'ju jap çlodhje. Merrni mbi vete zgjedhën time dhe mësoni nga unë, sepse unë jam zemërbutë dhe i përulur nga zemra; dhe ju do të gjeni prehje për shpirtrat tuaj. Sepse zgjedha ime është e ëmbël dhe barra ime është e lehtë!” (Mateu 11:28-30).
Jezusi përdori një shëmbëlltyrë agrikulturore që dëgjuesit e Tij do ta kuptonin. Për të arritur produktivitetin më të lartë nga një ka, zgjedha në qafën e tij duhet të jetë e rehatshme. Dhe një mentor i mirë është dikush i cili të kupton dhe njeh se çfarë përshtatet me temperamentin dhe talentet e tua. Një mentor është një palë sy dhe veshë shtesë dhe që gjithmonë ka në zemër më të mirën për ty. Kur e mendon, të kesh mentorin e duhur është një nga investimet më të mira që ti mund të bësh në të ardhmen tënde.
